सोमबार सेयर बजार परिसूचक नेप्से ४४ दशमलव ५६ अंक (१ दशमलव ८१ प्रतिशत)ले घटेर दुई हजार चार सय १९ दशमलव ८० बिन्दुमा आइपुुगेको छ । कारोबार अवधिभर बजारमा तीव्र उत्तारचढाव देखिएको छ । बजार खुलेको केही समयमै दुई हजार पाँच सयको बिन्दुबाट नेप्से पुनः फर्किएको थियो । यसले दुई हजार चार सयको मनोवैज्ञानिक बिन्दुबाट उकालो लाग्ने प्रयासको संकेत गर्छ ।
बैंकिङ क्षेत्रमा तरलता अभावको समस्या, देशको आर्थिक अवस्था गिर्दो, विदेशी मुद्रा सञ्चितिको दबाबजस्ता विषयले अर्थतन्त्र थप समस्यामा परेको छ । मूल्यवृद्धिदर झनै बढेको छ । बैंकहरूले आर्थिक संकट निम्तिन सक्ने भन्दै विलासी वस्तु आयातमा रोक लगाएका छन् । यसले लगानीकर्ताको खर्च क्षमतामा पनि प्रभाव परेको छ भने प्राथमिकता पनि बदलिएको छ । त्रैमासको अन्तिम महिना भएकाले लगानीकर्ता ब्याज तिर्नुपर्ने चापमा परेकाले पनि बजारप्रतिको उत्साह कम छ ।
सोमबार धितोपत्र र ऋणपत्र गरी दुई सय ३३ कम्पनीको ५० लाखभन्दा बढीको कित्ता सेयर खरिद–बिक्री हुँदा दुई अर्ब २६ करोड रुपैयाँको कारोबार भएको छ । नेपाल लाइफ इन्स्योरेन्स, नेपाल इन्फ्रास्ट्रक्चर बैंक (निफ्रा), नबिल बैंकको सेयर सबैभन्दा धेरै ६ करोड रुपैयाँदेखि १६ करोड रुपैयाँले कारोबार हुन पुगेको छ । नेपाल लाइफ इन्स्योरेन्स र निफ्राको सेयर मूल्यमा आएको गिरावटसँगै लगानीकर्ताले यी कम्पनीको सेयर खरिद–बिक्री बढाएका छन् भने नबिल बैंकको सेयर मूल्य निकै घटेकाले पनि यस कम्पनीको सेयर लगानीकर्ताले उठाउन थालेको ब्रोकरहरूको दाबी छ ।
यस दिन एक सय ७६ वटा कम्पनीको सेयर मूल्य घटेको छ भने १७ वटा कम्पनीको सेयर मूल्य बढेको छ । नेस्डो समृद्ध लघुवित्त वित्तीय संस्था र जाल्पा सामुदायिक लघुुवित्त वित्तीय संस्थाको सेयर मूल्य १० प्रतिशतले बढेर सकारात्मक सर्किट लागेको छ । पछिल्लो समय कम्पनीको सेयर मूल्यमा सर्किट लाग्दै आएको छ । कारोबारमा आएका १३ वटै समूहका सूचक घटेका छन् । ‘अन्य’ समूहको सूचक सबैभन्दा धेरै चार दशमलव ६२ प्रतिशतले घटेको छ भने जीवन बिमा समूहको सूचक ३ प्रतिशतमाथिले घटेको छ ।
इमर्जिङ नेपाल र राष्ट्र उत्थान लघुवित्तको सेयर मूल्य १० प्रतिशतले घटेर नकारात्मक सर्किट लागेको छ । नेपाल दूरसञ्चार कम्पनी र हिमालयन पावर पार्टनरको सेयर मूल्य ५ प्रतिशतदेखि ६ प्रतिशतमाथिले घट्न पुुगेको छ । त्यस्तै, ‘क’ वर्गका कम्पनीहरूको कारोबारमापक सेन्सेटिभ इन्डेक्स ८ दशमलव ८७ अंकले घटेर चार सय ५४ दशमलव ९७ बिन्दुमा आइपुगेको छ ।