मालिक सुकलामा हुनुहुन्छ
बन्द गर तिम्रा चित्कार
छुसी रैतीहरुको गथासोले
भंग नहोस् मालिकको निद्रा ।
बन्द गर तिम्रा गुनासो -
अब मालिकको शासनमा
कोहि बोल्नु पर्दैन
केहि माग्नु पर्दैन ,
खाने रासन वा सिटामोलको गोली ।
केवल रट सम्बृद्दीको जप
अब छिटै आउने छ रेल
छिटै चल्नेछ पानीजहाज
र त्यसैमा आउनेछ -
तिम्रा लागि राशन र ओखती
तेतिन्जेल तिमी चाहे भोकले मर या त रोगले
नबोल सम्बृद्धीको बाटोमा तगारो बनेर
तिम्रो हल्लाले मालिकको सपना विथोलिन्छ ।
सम्बृद्धीको सपना देख्न सुत्नुपर्छ
कृपया चुपचाप बस
निदाउन देउ सरकारलाई ।
ए ! कसले खोल्यो त्यहॉं रेडियो
र बजायो जीवन शर्माको गीत ?
कसले हेर्दैछ छेउको टिभीमा
पशुपती शर्माको ‘लुट कान्छा’ दोहोरी ??
कोहि त सुन !
बन्द गर यस्ता कर्कश गीतहरु,
बरु सुनाउ २-४ थान चुट्किलाहरु
बरु बजाउ मालिकको सेवा भजन
सक्दैनौ भने बजाउनु हनुमान चालीसा
र रामायणका श्लोकहरु
तर कदापि नबजाउ रायन र रामेशहरु
आज बुझिंदैछ
कति कर्कश लाग्ने रहेछ सत्तामा बस्दा
हिजो आफैंले गाउंदै हिडेका
राल्फा र रक्तिमका गीतहरु
तेसैले त मन भुलाउन महाराज आफैंले लेखिबक्सेछ
‘गाजलु ती ठूला ठूला ऑंखा।।’ जस्ता प्रेमील गीतहरु ।