काभ्रेको बनेपा नगरपालिका– १४ मा सञ्चालित ढुंगाखानीमा पहिरो जाँदा एकजनाको घटनास्थलमै मृत्यु भएको छ । आशापुरी खनिज उद्योगमा पहिरो जाँदा दुईजना व्यक्तिको घाइते अवस्थामा उद्धार भएको छ भने अन्य कैयौँ मानिस पुरिएको हुन सक्ने आशंका गरिएको छ ।
स्थानीय शिक्षक सरोज सापकोटाका अनुसार धेरैवटा सवारीसाधन र एक्स्काभेटर, टिपर पुरिएको छ । ‘डरलाग्दो अवस्था छ । त्यहाँ बस्न डर लागेर फर्किएँ म,’ सापकोटाले भने, ‘एकजनाको ढुंगाले च्यापिएर मृत्यु भएजस्तो देखिन्छ । आठ–नाैवटा टिपर, ट्रक, एक्स्काभेटरलगायत पुरिएजस्तो देखिन्छ ।’
अहिलेसम्म पहिरो खसिरहेको सापकोटाले जानकारी दिए । तलबाट एक्स्काभेटर तथा डोजरले ढुंगा निकाल्दै जाँदा ओडारजस्तो बनेर पहिरो गएको सापकोटाले जानकारी दिए । अहिलेसम्म दुई–चारजना प्रहरीबाहेक कुनै उद्धार टोली घटना स्थलमा नआइपुगेको उनले बताए ।
जिल्ला प्रहरी कार्यालय काभ्रेका सूचना अधिकारी प्रहरी नायव उपरीक्षक हरि खतिवडाले पहिरो गएर एकजनाको मृत्यु भएको, तर सबै विवरण भने आइनसकेको बताए । इलाका प्रहरी कार्यालय बनेपाका प्रहरी घटनास्थलमा पुगेको, तर सबै जानकारी आइनसकेको खतिवडाले बताए । दुईजना घाइतेको उद्धार भएको पनि उनले जानकारी दिए । आफूहरू घटनास्थलमा जाँदै गरेको बताए ।