परालको ओछ्यान र परालकै घुराबाट चिसो छल्ने प्रयासमा रहेका महोत्तरीका ६० मुसहर परिवारले खाद्यान्न र कम्बल सहयोग पाएका छन् । शीतलहर प्रभावित मटिहानी नगरपालिका– ४ मझौरास्थित मुसहर बस्तीका ६० परिवारलाई नेपाली सेनाको सैनिक श्रीमती संघ र रणभीम गणले शुक्रबार खाद्यान्न र कम्बल सहयोग गरेको हो ।
सेनाको ९ नम्बर बाहिनीपति सहायक रथी शिशिरचन्द्र केसी विपन्न परिवारलाई राहत वितरण गरे । शीतलहरले अतिप्रभावितहरूलाई नेपाली सेना र सैनिक परिवारको तर्फबाट सानो सहयोग गरिएको उनले बताए ।
उनले नेपाली सेनाले शीतलहर, बाढी, आगलागीलगायतका विपद्का वेला सहयोगीको भूमिका निर्वाह गर्दै आएको चर्चा गरे । मटिहानी नगरपालिकाका नगरप्रमुख हरिप्रसाद मण्डलले दलित तथा विपन्नहरू शीतलहरबाट सबैभन्दा बढी प्रभावित रहेको भन्दै सहयोगको प्रयास भइरहेको धारणा राखे ।