संखुवासभाका १० मध्ये ६ पालिकामा माओवादी केन्द्रको नेतृत्व सर्वसम्मत चयन भएको छ । हालसम्म खाँदबारी, मादी र पाँचखपन नगरपालिका तथा चिचिला, सिलिचोङ र सभापोखरी गाउँपालिकामा सर्वसम्मत नेतृत्व चयन भएको माओवादी केन्द्रका जिल्ला संयोजक कृष्ण जिमीले जानकारी दिए ।
उनका अनुसार चैनपुर नगरपालिका र भोटखोला गाउँपालिकामा नेतृत्व चयनका लागि छलफल भइरहेको छ । अन्य पालिकाको नेतृत्व पनि छिट्टै चयन हुने माओवादी केन्द्रले बताएको छ ।
माओवादी केन्द्रका अध्यक्ष पुष्पकमल दाहाल ‘प्रचण्ड’ले भर्चुअल माध्यमबाट पालिकास्तरीय अधिवेशन उद्घाटन गरेका थिए ।
खाँदबारी नगरपालिका
खाँदबारी नगर कमिटीको अध्यक्षमा दिव्यराज बराल चयन भएका छन् । प्रथम नगर अधिवेशनले ४५ सदस्यीय नगर कमिटी चयन गरेको छ । कमिटीको उपाध्यक्षमा चन्द्रबहादुर जोगी, कुमार तामाङ र सुशीला घिमिरे छन् । अधिवेशनले सचिवमा लक्ष्मी लिम्बू, सहसचिव अर्जुनबहादुर विश्वकर्मा र कोषाध्यक्ष हरिबहादुर जोशीलाई चयन गरेको छ ।
मादी नगरपालिका
मादी नगरपालिकाको नगर अधिवेशनबाट दाबा शेर्पा अध्यक्षमा चयन भएका छन् । नगर कमिटीको उपाध्यक्षमा रमेश कार्की, शुक्राहाङ लिङ्थेप र रबिनकुमार लो रहेका छन् । सचिवमा पुष्प कोइराला, सहसचिबमा रमेश लुङ्बा र कोषाध्यक्षमा योगकुमारी कार्कीसहित ६५ सदस्यीय कमिटी चयन गरिएको छ ।
पाँचखपन नगरपालिका
कर्ण राईको अध्यक्षतामा पाँचखपन नगरपालिकामा ६१ सदस्यीय नगर कमिटी गठन भएको छ । नगर कमिटीको उपाध्यक्षमा सनमान विक, सुकबहादुर लिम्बू र रूपा सुवेदी रहेका छन् भने सचिव प्रकाश पुरी, सहसचिव छिरिङ शेर्पा र दीपेन्द्र राईलाई अधिवेशनले चयन गरेको हो ।
चिचिला गाउँपालिका
चिचिला गाउँपालिकाको अध्यक्षमा डम्बरजंग गुरुङ चयन भएका छन् । ५५ सदस्यीय कमिटीको उपाध्यक्षमा तारा राई, वकिल राई, वीरबहादुर गुरुङ र सचिवमा नयन्द्र लाम्सोङ राई चयन भएका छन् । सहसचिवमा पूजन राई र कोषाध्यक्षमा तीर्थमाया राई चयन भएका हुन् ।
सिलिचोङ गाउँपालिका
सिलिचोङ गाउँपालिकाको अध्यक्षमा ईश्वर कुलुङ चयन भएका छन् । ५५ सदस्यीय पालिका कमिटीको उपाध्यक्षमा निर्मला राई, मनराम राई र माधव राई चयन भएका छन् । सचिवमा बालकिशोर कुलुङ, सहसचिव हेमराज राई र कोषाध्यक्षमा किसन राई चयन भएका छन् ।
सभापोखरी गाउँपालिका
विष्णुकुमार तामाङको अध्यक्षतामा ४५ सदस्यीय सभापोखरी गाउँकमिटी गठन भएको छ । उपाध्यक्ष छत्रमणि अधिकारी, गुरु सिटौला, शेरबहादुर खड्का चयन भएका छन् । सचिवमा जुद्ध बनेम, सहसचिवमा रमेश न्यौपाने र कोषाध्यक्ष सुष्मा तामाङ चयन भएका छन् ।