खोलामा बस खस्दा एक जनाको मृत्यु २५ घाइते
नवलपरासी पूर्वको कावासोती १४ को चालिस किलो जंगलमा बिहीबार बिहान बस अनियन्त्रित भई खोलामा खस्दा एक जनाको मृत्यु भएको छ । दुर्घटनामा २५ जना घाइते भएका छन् ।
मृत्यु हुनेमा भारत महाराजगञ्ज नौतनवाकी ३५ वर्षीय गौरी शंकर धोवी रहेका छन् । दुर्घटनामा गम्भीर घाइते हुनेमा गैडाकोट ५को रमा तामाङ्ग, विहारका मेहबुब आलम, कपिलवस्तु पिपरा ६ का दुधनाथ गुप्ता र रोहन कशोधन रहेका जिल्ला प्रहरी कार्यालय नवलपरासी पूर्वका प्रहरी प्रमुख रमेश थापाले बताए । गम्भीर घाइते भएका चार जना मध्ये दुई जनाको भरतपुर र दुई जनाको बुटवलमा उपचार भइरहेको छ । अन्य घाइतेको कावासोतीका विभिन्न अस्पतालमा उपचार भइरहेको प्रहरीले जनाएको छ ।
काँकडभिट्टाबाट बुटवलका लागि छुटेको ना४ख ७०४६ नंको बस कावासोती–१४ स्थित झिनकी भणरिनिया खोलामा खसेको हो । करीब ३५ जना यात्रु सवार रहेको बस सडकदेखि २५ मिटर तल खसेको थियो ।