हिमाली जिल्ला डोल्पाका दुईवटा सामुदायिक वनमा डढेलो लागेको छ ।
त्रिपुरासुन्दरी नगरपालिका वडा नं ६ मा पर्ने कैलासि सामुदायिक वन र वडा नं ५ मा पर्ने लेखठेरी सामुदायिक वनमा शुक्रबार दिउँसो डढेलो लागेको हो ।
आगलागिबाट कैलासि क्षेत्रको अधिकांश भूभाग जलेर नष्ट भएको र लेखठेरीको करिब पाँच सय सल्लाका रुख जलेर नष्ट भएको इलाका प्रहरी कार्यालय करोपगाडले जनाएको छ । डढेलो नियन्त्रणका लागि इलाका प्रहरी चौकी करोपगाड्, नेपाली सेनाको नरसिँह दल गुल्म र हरीयापानी बहुउदेश्यीय सहकारीका सदस्यहरु परिचालन भएको सहकारीका अध्यक्ष मोती प्रसाद उपाध्यायले बताए ।
डढेलो नियन्त्रण भइनसकेको र शनिबार बेलुकासम्म नियन्त्रणमा आउनसक्ने सम्भावना रहेको उपाध्यायको भनाइ छ । डढेलोको कारण खुल्न नसकेपनि गोठाला गएका बालबालिकाहरुले आगो लगाएको अनुमान गरिएको छ ।