महोत्तरीको गौशाला नगरपालिका रामनगरमा १ अर्ब ५० करोड रुपैयाँको लगानीमा नयाँ कागज उद्योग स्थापनाका हुने भएको छ । आइएमई समूहका अध्यक्ष चन्द्रप्रसाद ढकालसहित लगानीकर्ता, उद्योगपतिले नेपाल पल्स ऐन्ड पेपर इन्डस्ट्रिज प्रालिको शिलान्यास गरेका हुन् ।
उद्योगमा अध्यक्ष ढकाल, जनकपुरको सर्राफ समूह, सुनीलगोपाल श्रेष्ठ र होमनाथ ज्ञवालीको लगानी रहेको जनाइएको छ । आइएमई समूहद्वारा प्रवद्र्धित यस उद्योगको आफ्नै ११ बिघा जमिनमा निर्माण हुने भवनमा कारखाना सञ्चालन हुनेछ । उद्योगलाई आवश्यक पर्ने सबै उपकरण र यन्त्र जडानको काम एक वर्षभित्र सम्पन्न गरेर उत्पादनको काम सुरु गर्ने जनाइएको छ ।
उद्योग सञ्चालनमा आएपछि दैनिक ७५ टन कागज उत्पादन गर्ने क्षमता रहने शिलान्यास कार्यक्रममा जानकारी दिइयो । उद्योग सञ्चालनमा आएलगत्तै कम्तीमा सयजनाले तत्काल रोजगार पाउने बताइएको छ । शिलान्यासपछि अध्यक्ष ढकालले एक वर्षमा कारखाना भवन निर्माण भएसँगै उत्पादन थालिने जानकारी दिए ।
कागज उत्पादनको क्षेत्रमा काम गरिरहेका वरिष्ठ र अनुभवी व्यवसायीको संलग्नतामा सञ्चालन हुने यस कारखानाबाट नेपालमा हुने कागजको आयातलाई प्रतिस्थापन गरिने उनको भनाइ थियो । नेपालमा ‘फिनिक्स प्रडक्ट’ नै दिने यस्तो खालको उद्योग पहिलोपटक स्थापना हुन लागेको ढकालले बताए ।