एकतामा देखिएको समस्या समाधानका लागि गठित एमाले कार्यदलको बैठकमा पार्टीका २७ सांसदहरूले कांग्रेस सभापति शेरबहादुर देउवालाई प्रधानमन्त्रीमा समर्थन गरेको विषयमा छलफल भएको छ ।
वरिष्ठ नेता माधवकुमार नेपालनिकट सांसदहरूको हस्ताक्षरपछि पार्टी फुटको तहमा पुगेको प्रधानमन्त्री केपी ओलीनिकट नेताहरूले प्रसंग उठाएपछि एकता जोगाउने विषयमा केन्द्रित रहेर छलफल भएको सदस्यहरूले बताएका छन् ।
‘राष्ट्रिय परिस्थितिबारे सौहार्दपूर्ण छलफल भयो, त्यसमा सबैले आ–आफ्ना दृष्टिकोण राख्नुभो,’ बैठकपछि नेता रघुजी पन्तले भने, ‘छलफलमा पार्टी एकतालाई जोगाउनुपर्छ भन्नेमा सबैबीच सहमति भएको छ, तर अर्को बैठक दुवै पक्षको सहमतिमा एक–दुई दिनमा राख्नेगरी उठेका छौँ ।’ उनले हस्ताक्षर प्रकरणका विषयमा भने कुनै छलफल नभएको दाबी गरे ।