नेकपा एमालेका वरिष्ठ नेता माधवकुमार नेपालले नेकपा एमालेका लागि वार्ता र लचकता दुवै अपनाउन सक्ने बताएका छन् । शुक्रबार सामाजिक सञ्जालमार्फत नेता नेपालले सिद्धान्तनिष्ठ, क्रान्तिकारी, नीति र विधिको आधारमा चल्ने सुदृढ र एकताबद्ध एमाले चाहेको हुनाले वार्ता र लचकता दुवै अपनाउन तयार भएको बताएका हुन् ।
उनले आफूहरूले निर्माण गरेको एमालेका लागि २०७७ फागुन २८ गते र तत्पश्चात् बसेका कथित बैठकहरू र त्यसले गरेका निर्णय फिर्ता लिए लचक बन्न तयार रहेको बताएका हुन् । उनले लेखेका छन्, ‘वार्ता र लचकता दुवै अपनाउँछौँ, तर सहमति भइसकेको छैन ! हामी सिद्धान्तनिष्ठ, क्रान्तिकारी, नीति र विधिको आधारमा चल्ने सुदृढ र एकताबद्ध एमाले चाहन्छौँ किनकि यो हामीले निर्माण गरेको पार्टी हो । यसका लागि वार्ता र लचकता दुवै अपनाउँछौँ, तर अहिलेसम्म कुनै सहमति भएको छैन । ०७७ फागुन २८ गते र तत्पश्चात् बसेका कथित बैठकहरू र त्यसले गरेका निर्णयहरू फिर्ता लिनुपर्छ र २०७५ जेठ २ गतेको कमिटी, विधान र नेतृत्व नै हाम्रो बटमलाइन हो । यस सम्बन्धमा कुनै किसिमको भ्रममा नपर्न, नअल्मलिन र सुदृढ र सशक्त पार्टी बनाउने महान् अभियानमा लागिरहन आह्वान गर्दछौँ ।’