राष्ट्रपति विद्यादेवी भण्डारीले गण्डकी र सुदूरपश्चिम प्रदेश प्रमुख हेरफेर गरेकी छिन् । यससँगै सातवटै प्रदेशमा एमालेकै तर्फबाट प्रदेश प्रमुख बनेका छन् । 

मन्त्रिपरिषद् बैठकको सिफारिसअनुसार राष्ट्रपति भण्डारीले गण्डकीमा चितवनकी सीता पौडेल र सुदूरपश्चिम प्रदेशमा पूर्वउपसभामुख गंगाप्रसाद यादवलाई प्रमुखमा नियुक्त गरेकी हुन् ।

दुवैले राष्ट्रपति कार्यालय शीतलनिवासमा राष्ट्रपति भण्डारीबाट सोमबारै शपथ लिएका छन् । नियुक्तिअघि प्रधानमन्त्रीनिवास बालुवाटारमा बसेको मन्त्रिपरिषद् बैठकले दुई प्रदेश प्रमुख हेरफेरका लागि सिफारिस गर्ने निर्णय गरेको थियो ।

चितवनकी पौडेल अनेमसंघकी पूर्वमहासचिव हुन् भने पूर्वउपसभामुख यादव ०७४ मा राप्रपाबाट एमाले प्रवेश गरेका थिए । गण्डकीमा अमिक शेरचन र सुदूरपश्चिममा शर्मिला त्रिपाठी प्रदेश प्रमुख थिए । उनीहरू दुवैले माओवादी केन्द्रबाट प्रतिनिधित्व गर्दै आएका थिए ।

यसअघि ८ फागुनमा २ नम्बर प्रदेश प्रमुख तिलक परियारलाई हटाएर राष्ट्रपति भण्डारीले डा. राजेश अहिराजलाई नियुक्त गरेका थिए । माओवादी केन्द्रबाट सिफारिस भएका अब कोही पनि प्रदेश प्रमुख छैनन् ।