प्रदेश १ मा सोमबारसम्म सक्रिय कोरोना संक्रमितको संख्या एक सय ४० पुगेको छ । प्रदेश १ सामाजिक विकास मन्त्रालयका अनुसार सोमबार तीन सय ५० जनाको पिसिआर परीक्षण गर्दा ११ महिला र १४ पुरुषमा कोरोना संक्रमण फेला परेसँगै सक्रिय संक्रमितको संख्या एक सय ४० पुगेको हो ।
मोरङमा ११, सुनसरीमा ६, झापा र संखुवासभामा तीन–तीन र प्रदेश १ बाहिरका दुईजनामा कोरोना पजिटिभ देखिएको मन्त्रालयले जनाएको छ । विराटनगरमा ११, सुनसरीको इनरुवा र धरानमा दुई–दुई, दुहबी र इटहरीमा एक–एक, झापाको दमकमा दुई र भद्रपुरमा एक, संखुवासभाको खाँदबारीमा दुई र धर्मदेवीमा एक र प्रदेश १ बाहिरका दुईजनाको रिपोर्ट पजिटिभ आएको छ । प्रदेश १ मा हालसम्म संक्रमित हुनेको संख्या ३० हजार चार सय ७० पुगेको छ । जसमा सक्रिय संक्रमितको संख्या एक सय ४० छ ।
कोरोना संक्रमितको संख्या पुनः बढ्न थालेपछि प्रदेश १ सरकारले विराटनगरस्थित कोभिड अस्पताललाई तयारी अवस्थामा राखेको छ ।