नेपाली सेनाको भ्रमणमा रहेको टोलीले बिरामी महिलाको उद्धार गरेको छ । उत्तर पश्चिम पृतनापति र २४ नम्बरका बाहिनीपतिको डोल्पा हवाई भ्रमणका क्रममा उपल्लो डोल्पा पुगेको सेनाको हेलिकाेप्टरले तिन्जेबाट हेपाटाइटिस ‘बी’ पीडित  महिलाको उद्धार गरेको हो । 

से–फोक्सुन्डाे गाउँपालिका– ४ बस्ने २३ वर्षीया टिजिङखाँडो गुरुङलाई हिमाल अवलोकनको भ्रमणमा रहेको उत्तर पश्चिम पृतनापति विज्ञानदेव पाण्डे र २४ नं. बाहिनीका सहायक रथी यामबहादुर सापकोटाको टोलीले उद्धार गरेको रामवाण गुल्मका गुल्मपति सेनानी अशोककुमार क्षेत्रीले जानकारी दिए ।

स्वास्थ्यचौकीमा सामान्य उपचार गराइरहेकी उनको स्वास्थ्य अवस्था नाजुक बनेपछि थप उपचारका लागि तिन्जेबाट उद्धार गरी जिल्ला अस्पताल पुर्‍याइएको सेनानी क्षेत्रीको भनाइ छ । उनको प्राणघातक रोग हेपाटाइटिस ‘बी’को कारण कलेजो कमजोर भएको जिल्ला अस्पतालको भनाइ छ ।