कांग्रेस नेता गगन थापाले यो सरकार रहुन्जेल प्रधानमन्त्रीले संसद्सँग बदला लिने बताएका छन् । संसद्को तिरस्कार, अपमान र उपेक्षा गर्ने काम अझै बढ्दै जाने उनले बताए ।
थापाले मंगलबार प्रतिनिधिसभाको बैठकमा भने, ‘हामी स्पष्ट छौँ, जति दिन यो सरकार रहन्छ संसद्को तिरस्कार, अपमान र उपेक्षा गर्ने काम अझै बढ्दै जान्छ । किनकि प्रधानमन्त्रीलाई यो संसद्सँग बदला लिनुछ । हामी हाम्रो ठाउँबाट डटेर संसद्को गरिमा कायम राख्नका निम्ति लड्नेछौँ । बाँकी जिम्मा जनताको हो । यथोचित समयमा जनताले यसको हिसाबकिताब गर्नेछन् । किनकि यो संसद् र सांसदको अपमान, यो लोगो लगाउने केही थान सांसदको अपमान, तिरस्कार र उपेक्षा हाेइन । यो जनताको अपमान हो जसले यो संसद् बनाएको छ । जसले हामीलाई सांसद बनाएको छ । आफ्नो अपमानको बदला जनताले यथोचित समयमा लिनेछन् । यो संसदभित्र बसेर यसको गरिमा जोगाउन हामी आफ्नो ठाउँबाट डटेर लड्नेछौँ ।’