नेपाल यातायात व्यवसायी राष्ट्रिय महासंघले मूल्यवृद्धिको आधारमा चैतको तेस्रो साताभित्र भाडा समायोजन गर्न माग गरेको छ । भौतिक पूर्वाधार तथा यातायातमन्त्री वसन्तकुमार नेम्वाङलाई बिहीबार ज्ञापनपत्र बुझाउँदै महासंघले भाडा समायोजन नगरिए सवारीसाधन नचलाउने बताएको छ । 

महासंघले वैकल्पिक व्यवस्था नभएसम्मका लागि २० वर्ष अवधि पुगेका सार्वजनिक सवारीसाधनहरूलाई म्याद थप गरी सञ्चालनको अनुमति दिन पनि माग गरेको छ । वैकल्पिक व्यवस्था नभएसम्मका लागि २० वर्षे अवधि पुगेर पनि हाल सञ्चालन रहेका सवारीसाधनलाई म्याद थप गर्न अनुरोध गरेको हो । 

प्राविधिक जाँचको आधारमा सञ्चालन व्यवस्था गरिदिनुपर्ने महासंघको माग रहेको छ । २० वर्षे सवारीसाधनहरू विस्थापित गरिए नयाँ सवारीसाधनका लागि शतप्रतिशत भन्सार छुट गरिदिनुपर्ने माग रहेको नेपाल यातायात व्यवसायी राष्ट्रिय महासंघका महासचिव सरोज सिटौलाले बताए । 

ज्ञापनपत्र बुझ्दै मन्त्री नेम्वाङले यातायात व्यवस्था विभागसँग आवश्यक छलफल गर्ने प्रतिक्रिया दिएका छन् ।