शिक्षा, विज्ञान तथा प्रविधिमन्त्री कृष्णगोपाल श्रेष्ठले सरकारले संघीय शिक्षा ऐन ल्याउने तयारी गरेको बताएका छन् । वि.सं. २०२८ को शिक्षा ऐनले शिक्षा क्षेत्रमा देखिएको सबै विषय समेट्न नसकेकोले सबै विषय समेट्ने गरी संघीय शिक्षा ऐनको तयारी भइरहेको उनले बताए ।
मन्त्री श्रेष्ठले जनताका छोराछोरीलाई सरकारी विद्यालयमा पढ्ने वातावरण सिर्जना गर्न गुणस्तरीय शिक्षा आवश्यक रहेको र त्यसको लागि सरकारी विद्यालयको सुधार गर्नुपर्नेमा जोड दिए ।
चन्द्रागिरी नगरपालिका– १५ नैकापमा निर्माण हुन लागेको विष्णुदेवी माविको शिलान्यास गर्दै मन्त्री श्रेष्ठले सरकारको पहिलो प्राथमिकता गुणस्तरीय शिक्षा नै भएको बताए ।
भारत सरकारकोे ६ करोड ४८ लाखको लागतमा विद्यालय भवन निर्माण हुन लागेको हो । ३२ कोठे विद्यालय भवन निर्माण हुनेछ । ठेकेदार कम्पनीले १५ महिनामा सम्पन्न गर्ने सम्झौता छ । भारतले ७० विद्यालय पुनर्निर्माण गरिरहेको छ । २८ आंगिक क्याम्पस बनाउने तयारी गरेको छ ।