जनयुद्ध दिवसमा गुरिल्ला 'म्याराथन' हुने
जनयुद्ध दिवसको अवसरमा रुकुम (पश्चिम)को सानीभेरी गाउँपालिकामा गुरिल्ला ‘म्याराथन’ हुने भएको छ । दिवसको अवसरमा गाउँपालिकाले गत वर्षदेखि आयोजना गर्दै आएको ‘म्याराथन’को दोस्रो संस्करण बुधबार हुने भएको हो ।
तत्कालीन नेकपा माओवादीले संचालन गरेको १० वर्षे जनयुद्धमा लडाकुले प्रयोग गरेको बाटोमा ‘म्याराथन’ हुने भएको हो । प्रतियोगिता २३ किलोमिटरमा संचालन हुने गाउँपालिकाले जनाएको छ ।
सानीभेरी गाउँपालिकाको कार्यालय सिम्लीबाट सुरु हुने प्रतियोगिता मौराखारा, चाख्लेमेला, रिम्ना दोभान, जाजरकोटको रिम्ना हुँदै सोही ठाउँमा पुगेर समाप्त हुने भएको छ । ‘म्याराथन’को तयारी पूरा भएको गाउँपालिकाले जनाएको छ ।
प्रतियोगितामा भाग लिन गोरखा, प्युठान, रोल्पा, बाँकेलगायत जिल्लाका ४० बढी खेलाडीले प्रतिस्पर्धा गर्ने छन् । प्रतियोगितामा विजेताले ६० हजार, उप विजेताले ४५ हजार, तेस्रोले ३५ हजार र शान्त्वना हुनेले १० हजार पुरस्कार पाउँने छन् । त्यस्तै उत्कृष्ट १० खेलाडीलाई समेत सम्मान गरिने गाउँपालिका अध्यक्ष नरबहादुर पुनले बताए ।