हंगेरीमा कोरोनाविरुद्ध चिनियाँ खोप पनि प्रयोग गरिने
हंगेरीमा कोरोना भाइरसविरुद्ध चिनियाँ खोप पनि प्रयोग गरिने भएको छ । हंगेरीका सरकारी अधिकारीहरूले चिनियाँ खोप प्रयोग गर्ने निर्णय गरेका हुन् ।
उनीहरूले चीनमा विकास गरिएको सिनोफार्म खोप प्रयोग गर्ने निर्णय गरेको शुक्रबार जानकारी दिएका छन् । हंगेरीका प्रमुख मेडिकल अधिकृत सेसिलिया मुलरले भने, ‘राष्ट्रिय फार्मेसी तथा पोषण इन्स्टिच्युटले शुक्रबार चिनियाँ सिनोफार्म खोप प्रयोग गर्ने निर्णय गरेको छ ।’
यसबाहेक हंगेरीमा फाइजर बायोन्टेकले विकास गरेको खोप, बेलायतमा विकास गरिएको र रुसमा विकास गरिएको खोपलाई पनि प्रयोगका लागि अनुमति दिइसकिएको छ । विश्वभरि महामारीका रूपमा फैलिएको कोरोना भाइरसविरुद्धमा अरू पनि धेरै वैज्ञानिकले खोप विकास गर्ने प्रयास गरिरहेका छन् ।
विश्व स्वास्थ्य संगठन (डब्लुएचओ)ले गत मंगलबार दिएको जानकारीअनुसार अहिले विश्वभरि २३६ प्रकारका खोप विकास गरिएको छ भने तीमध्ये ६३ वटा चिकित्सकीय परीक्षणका क्रममा छन् ।