दैलेखमा प्रहरीले लागुऔषध ब्राउनसुगरसहित दुईजनालाई पक्राउ गरेको छ ।
पक्राउ पर्नेमा कोहलपुर नगरपालिका– १० कालिकानगरका २७ वर्षीया सिर्जना गुरुङ र सोही ठाउँका २१ वर्षका विशाल रोकाय रहेको जिल्ला प्रहरी कार्यालय दैलेखका प्रहरी प्रमुख अनुपम श्रेष्ठले जानकारी दिएका छन् ।
दैलेखको गुराँस गाउँपालिका– २ तल्लो डुंगेश्वर प्रहरी चेकपोस्टनजिक सडक खण्डमा शंकास्पद अवस्थामा हिँडिरहेका उनीहरूलाई खानतलास गर्दा सिर्जना गुरुङले खुट्टाको मोजामा ४० पुरिया खैरो हिरोइन फेला पारेको उनले जनाए ।
प्रहरीले उनले धागोले बेरिराखेको अवस्थामा लागुऔषध धुलो पदार्थ फेला पारेको थियो । विशाल रोकायाको साथबाट नगद ३४ हजार फेला पारेको प्रहरीले जानकारी दिएको छ ।
पक्राउपछि दुवैजनालाई दैलेख जिल्ला अदालतबाट लागुऔषध ब्राउनसुगर मुद्दामा म्याद थप अनुमति लिई थप अनुसन्धान कार्य भइरहेको प्रहरीले जनाएको छ ।