विशेष अदालतले आयुर्वेदका चिकित्सक रामदेव यादवलाई सफाइ दिएको छ । उनलाई विशेषका न्यायाधीशहरू प्रेमराज कार्की, अब्दुल अजिज मुसलमान र चन्द्रबहादुर सारूको इजालसले बुधबार सफाइ दिएको हो ।
उनीमाथि अख्तियारले २०७५ जेठ ४ मा ३७ हजार रुपैयाँ घुस लिएको आरोपमा मुद्दा दायर गरेको थियो । उनी नरदेवीस्थित आयुर्वेद चिकित्सालयमा निमित्त निर्देशकका रूपमा कार्यरत रहँदा घुस लिएको अख्तियारको आरोप थियो ।
कन्सल्टेन्ट आयुर्वेद चिकित्सक (दशौं तह)मा रहेका उनले आयुर्वेद स्वास्थ्य सहायक तेस्रो वर्षमा अध्ययनरत विद्यार्थीहरूलाई तीनमहिने ओजेटी (प्रशिक्षण र तालिम) गराउने भन्दै घुस मागिरहेको भन्दै अख्तियारमा उजुरी परेको थियो ।
सूचनाका आधारमा आयोगको टंगालस्थित कर्यालयबाट खटिइगएको टोलीले उनलाई ३७ हजार रुपैयाँ लिइसकेको अवस्थामा आयुर्वेद चिकित्सालयको सरकारीनिवासबाटै नियन्त्रणमा लिएको थियो । उनी वैशाख चारमा पक्राउ परेका थिए । यसको एक महिनापछि अख्तियारले उनीमाथि मुद्दा दायर गरेको थियो ।