नेकपा प्रचण्ड- नेपाल समुहका अध्यक्ष माधवकुमार नेपालले परिवारमा झमेला भयो भनेर घरै समाप्त पार्ने केपी ओलीको प्रवृत्तिले सबै पार्टी र सिंगाे मुलुकलाई दु:ख दिने बताएका छन् ।

पार्टीद्वारा आयोजित अन्तर्क्रिया कार्यक्रममा नेपालले पार्टीभित्र काम गर्न दिइएन, हातखुट्टा बाँधियो, त्यसकारण अब देखाइदिन्छु भन्दै ओलीले नरहे बाँस नबजे बाँसुरी भनेझैँ लोकतन्त्र र संविधान नै धरापमा पर्ने गरी प्रतिनिधिसभा विघटन गरेको बताए ।

नेपालले ओलीको कदम नेकपाको आन्तरिक मामिला भनेर नपन्छिन आग्रह गर्दै त्यसले लोकतान्त्रिक गणतन्त्र र संघीयता नै धरापमा पर्ने भन्दै पार्टीहरूलाई सयुक्त संघर्षका लागि प्रस्ताव गरे ।

ओलीले संकटकालभन्दा अघि बढेर षड्यन्त्रको तानाबाना बुने पनि ती कुनै पनि सफल नहुने नेपालले ठोकुवा गरे ।