विश्व स्वास्थ्य संगठनको अनुसन्धान टोलीलाई वुहान प्रवेश अनुमति दिन चीनको आलटाल
विश्व स्वास्थ्य संगठन (डब्ल्युएचओ)का महानिर्देशक टेड्रोस अडानोम गेब्रियससले चिनियाँ अधिकारीहरूले विश्व स्वास्थ्य संगठनको अनुशन्धान टोलीलाई वुहानमा प्रवेश दिने विषयमा आलटाल गरिरहेको बताएका छन् । चिनियाँ वैज्ञानिकहरूले कोभिड–१९ को उत्पत्ति चीनमा नभएको दाबी गर्दै आएको र संगठनले पनि वुहानमा अनुसन्धान गर्न टोली पठाउने निर्णय गरेको थियो । तर, अनुसन्धान टोलीलाई चीन प्रवेशको अनुमति भने नमिलेकोमा टेड्रोसले दुःखेसो गरे ।
संगठनको विज्ञ टोलीमा संलग्न सदस्यहरू आ–आफ्ना देशबाट प्रस्थान गरिसकेका छन् । त्यसमध्ये दुईजना चीनका लागि प्रस्थान पनि गरिसकेका छन् । तर, सबै सदस्यलाई चीनले अझैसम्म अनुमति नदिएको उनले बताए । उनले भने, ‘हामीलाई त आज पो थाहा भयो कि विज्ञ टोलीमा संलग्नहरूलाई अनुमति नै दिइएनछ ।’ उनले यस घटनाबाट दुःखित बनेको बताएका छन् । टोलीमा संलग्न सदस्यहरूलाई अन्तिम समयमा चिनियाँ अधिकारीहरूले प्रवेश अनुमति नै नदिएको उनको भनाइ छ । यद्यपि, चिनियाँ अधिकारीहरूसँग सम्पर्कमै रहेको उनले बताएका छन् ।
ट्रोडोसले यो अभियान संयुक्त राष्ट्र संघको स्वास्थ्य एजेन्सीको प्राथमिकता पाएकाे र यसमा चीनले अनुसन्धान टोलीलाई सहयोग गर्ने आश्वासन दिएको बताए । यसका लागि चीनले पनि तयारी गरिरहेको जानकारी संघलाई दिएको थियो ।
विश्व स्वास्थ्य संघठनका आपत्कालीन कार्यक्रमका प्रमुख माइकल रेयानका अनुसार विशेषज्ञ टोली मंगलबार नै चीनको वुहान पुग्नुपर्ने थियो । तर, उनीहरूलाई भिसासहित अन्य कागजात र अनुमति दिइएन । कोरोना भाइरस महामारीका रूपमा फैलिरहेकै वेला चीनका राष्ट्रपति सी जिन पिङसँग डब्ल्युएचओका प्रमुखले अघिल्लो वर्ष भेटेका थिए ।
चीनको विदेश मन्त्रालयले भने विज्ञ टोलीहरू कुन स्थानमा कसरी र कहिले पुग्ने भन्ने विषयमा डब्ल्युएचओसँग छलफल जारी नै रहेको बुधबार जनाएको छ ।