कोरोना महामारीबाट सर्वाधिक असर परेको संयुक्तराज्य अमेरिकामा एक सातामा कोरोना संक्रमणबाट झन्डै १० हजार व्यक्तिको निधन भएको छ ।
जोन्स हप्किन्स विश्वविद्यालयका अनुसार हालसम्म अमेरिकामा कोरोना संक्रमणबाट मृत्यु हुनेको संख्या दुई लाख ७७ हजार नाघेको छ ।
पछिल्ला दिनहरूमा अमेरिकाका विभिन्न राज्य एवं सहरमा कोरोना संक्रमण तीव्र रूपमा फैलिएको छ ।
अमेरिकामा कोरोना संक्रमितको संख्या एक करोड ४१ लाख पुगिसकेको छ । अहिलेसम्म ८३ लाख ३३ हजार व्यक्ति संक्रमणमुक्त भएका छन् ।
विश्वभर कोरोना संक्रमणबाट १४ लाख ८६ हजार आठ सयभन्दा बढी व्यक्तिको मृत्यु भइसकेको छ ।
विश्वविद्यालयका अनुसार विश्वभर ६ करोड ४१ लाख ९४ हजारभन्दा बढी व्यक्ति संक्रमित भएका छन् भने चार करोड ४४ लाख ४२ हजार संक्रमणमुक्त भएका छन् ।
अझै पनि विश्वभर कोरोनाका कारण एक लाख ६ हजार व्यक्ति गम्भीर स्वास्थ्य समस्याबाट गुज्रिरहेका छन् ।