कालिकोटको तिलागुफा नगरपालिका– ४ राँचुलीमा शनिबार बिहान भएको आगलागीबाट लाखौँको धनमाल क्षति भएको छ ।
ढिलागरी प्राप्त सूचनाअनुसार बिहान खाना पकाउँदै गर्दा एक घरमा आगलागी हुँदा ११ घरधुरी जलेर पूर्ण रूपमा नष्ट भएका हुन् ।
शनिबार बिहान खाना पकाउने क्रममा एक घरमा आगलागी भएको र त्यसले ११ घरधुरी पूर्ण रूपमा क्षति भएको वडा तिलागुफा नगरपालिका– ४ राँचुलीका वडाध्यक्ष खड्कबहादुर शाहीले बताए ।
‘घर र काठले छाएका घर भएका कारणले आगलागीलाई नियन्त्रणमा लिन सकिएन,’ उनले भने, ‘घरमा भएको सबै धनमाल नष्ट भएको छ ।’
११ घरधुरीका सबैको अन्नपात, लत्ताकपडा, वस्तुभाउ पनि जलेको वडाध्यक्ष शाहीले जानकारी दिए ।
आगलागी भएर ११ घरधुरीमा क्षति पुगेको खबर आएको र त्यसतर्फ प्रहरी परिचालन गरिएको कालिकोटका प्रमुख जिल्ला अधिकारी कृष्णप्रसाद आचार्यले बताए ।
‘प्रहरी घटनास्थलमा पुगेको र क्षतिको विवरण संकलन गर्दै छ,’ उनले भने, ‘प्रहरीको मुचुल्कापछि मात्र क्षतिको विवरण आउनेछ ।’
आगलागीबाट घरवारविहीन भएकालाई तत्काल खान र बस्नका लागि नगरपालिकाले व्यवस्था गर्ने तिलागुफा नगरपालिका प्रमुख रतनबहादुर शाहीले बताए ।
‘आगलागीबाट ठूलो क्षति भएको छ,’ उनले भने, ‘पीडितलाई तत्काल राहत र खाना र वासको व्यवस्था नगरपालिकाले गर्ने तयारी गरेको छ ।’