काजकिरियामा जातीय विभेद गरेको आरोपमा मोरङको उर्लाबारीबाट प्रहरीले बुधवार ६ आरोपीमध्ये दुईजनालाई पक्राउ गरेको छ ।
उर्लाबारी नगरपालिका– ४ की ३० वर्षीया कोपिला बर्देवाले आफू सानो जात भएकै कारण ससुराको काजकिरिया सगोलमा गर्न नपाएको भन्दै २३ कात्तिकमा दिएको किटानी जाहेरीका आधारमा ६ जना आरोपीमध्ये दुईजनालाई प्रहरीले पक्राउ गरेको हो ।
इलाका प्रहरी कार्यालय उर्लाबारीका अनुसार पक्राउ पर्नेहरूमा कोपिलाका श्रीमान् दिवस र उनकी जेठी श्रीमती तारा गहतराज छन् । अन्य आरोपीहरूमध्ये सासू ५५ वर्षीया सुनिता गहतराज, दिवसकी जेठी श्रीमती ताराकी बहिनी २५ वर्षीया शारदा घतानी, जेठाजु ४० वर्षीय दीपक र ३८ वर्षीय शम्भु गहतराज फरार छन् । फरार रहेका अन्यहरूको खोजी भइरहेको इप्रका उर्लाबारीका इन्स्पेक्टर उद्धव पोखरेलले बताए ।
१३ कात्तिकमा निधन भएका ७० वर्षीय भीमराज गहतराजका (विश्वकर्मा) कान्छा छोराको कान्छी श्रीमती कोपिलाले आफूलाई सानो (परियार) जातको भन्दै ससुराको अन्त्येष्टि र पितृकर्म गर्न नदिएको भन्दै जातीय विभेद तथा छुवाछुत कसुरमा प्रहरीमा किटानी जाहेरी दिएकी थिइन् ।
उनले दश वर्षअघि स्वर्गीय भीमलालका कान्छा छोरा दिवस गहतराजसँग विवाह गरेकी थिइन् । उनीहरूका आठ वर्षीया एक छोरी छिन् ।
यो पनि पढ्नुहोस्
दलितभित्रै विभेद : सानो जात भन्दै विश्वकर्मा परिवारले परियार थरकी बुहारीलाई काजकिरियामा सँगै राखेन