पप्पु कन्सट्रक्सनका संचालक रौनियारको सांसद पद निलम्बन फुकुवा गर्न फोरमको माग
सत्तारुढ संघीय समाजवादी फोरम, नेपालले प्रतिनिधिसभा सदस्य हरिनारायणप्रसाद रौनियारको निलम्बन फुकुवा गर्न माग गर्दै सभामुख कृष्णबहादुर महरालाई ज्ञापन पत्र बुझाएको छ ।
फोरमले पर्सा क्षेत्र नम्बर ३ बाट जितेका पार्टीका सांसद रौनियारलाई संविधान र प्रतिनिधिसभा नियमावली विपरित निलम्बन गरेकाले तत्काल फुकुवा गर्न माग गर्दै बुधबार सभामुख महरालाई ज्ञापन पत्र बुझाएको हो ।
सांसद रौनियार प्रमुख रहेको पप्पु कन्सट्रक्सन प्रालि कालोसूचिमा परेपछि संघीय संसद सचिवालयले गत १९ असोजामा उनलाई निलम्बन गरेको थियो । सो निलम्बन संविधान र प्रतिनिधिसभा नियमवली विपरित रहेकाले तत्काल फुकुवा गरी संसदीय गतिविधिमा सहभागी गराउन माग गर्दै सभामुखलाई ज्ञापन पत्र बुझाइएको संसदीय समाजवादी फोरमका महासचिव रामसहाय प्रसाद यादवले बताए ।
फोरमको १८ माघमा संसदीय दलको बैठकले संविधान र प्रतिनिधिसभा नियमावली विपरित रौनियारलाई निलम्बन गरेको ठहर गर्दै तत्काल फुकुवा गर्न सभामुखलाई ज्ञापन पत्र बुझाउने निर्णय गरेको थियो । सोही निर्णय अनुसार पार्टीले बुधबार सो सम्बन्धमा सभामुखको ध्यानाकर्षण गराएको हो । सभामुख महराले सो विषयमा कानून, न्याय तथा संसदीय मामिला मन्त्री भानुभक्त ढकालसँग पनि छलफल गरेका थिए ।