कोरोना संक्रमित एक वडाध्यक्षको निधन भएको छ ।
कैलालीको गौरीगंगा नगरपालिका– ३ का अध्यक्ष नरेन्द्रबहादुर शाहको आज शुक्रबार बिहान सेती प्रादेशिक अस्पतालको कोरोना अस्थायी अस्पतालमा निधन भएको हो ।
७३ वर्षीय वडाध्यक्ष शाहको भेन्टिलेटरमा राखेर उपचार भइरहेको थियो । उनमा कडा खालको निमोनिया देखिएपछि १२ कात्तिकमा अस्पताल भर्ना गरिएकोमा १७ गते कोरोना पुष्टि भएको सेती प्रादेशिक अस्पतालका सूचना अधिकारी दिलीपकुमार श्रेष्ठले जानकारी दिए ।
कडा खालको निमोनिया देखिएपछि सुरुबाटै उनलाई आइसियूमा राखिएको श्रेष्ठले बताए । गौरीगंगा नगरपालिकाका प्रवक्तासमेत रहेका शाही नेकपा गौरीगंगा नगर कमिटीको सचिवालय सदस्य पनि थिए ।
प्रदेशको सामाजिक विकास मन्त्रालयका अनुसार सुदूरपश्चिममा हालसम्म कोरोना संक्रमित २५ जनाको निधन भएको छ ।
प्रदेशभर हालसम्म नौ हजार ६ सय ९३ जनामा संक्रमण पुष्टि भएको छ । प्रदेशभर एक हजार पाँच् सय १६ जना सक्रिय संक्रमित रहेका मन्त्रालयले जनाएको छ ।