- वि.सं २०८१ बैशाख १२ बुधबार
चिकित्सा शिक्षा क्षेत्र सुधारको माग राख्दै आएका डा. गोविन्द केसीले राजनीतिक दलका शीर्ष नेताहरूले माफियासँग मिलेर शिक्षा र स्वास्थ्य क्षेत्रमा व्यापार गरिरहेको आरोप लगाएका छन् ।
राजधानीमा बिहीबार पत्रकार सम्मेलन गर्दै डा. केसीले शिक्षा र स्वास्थ्य क्षेत्रलाई राजनीतिक दलका नेताहरूले माफिया र बिचौलियासँग मिलेर व्यापार गरिरहेको आरोप लगाएका हुन् ।
सबै स्वास्थ्य र शिक्षण संस्थाहरूमा आफ्ना कार्यकर्ताहरूका भर्तीकेन्द्र बनाएर धराशायी बनाइरहेको आरोप उनको छ । उनले भने, ‘सबै स्वास्थ्य र शिक्षण संस्थानहरूमा आफ्ना कार्यकर्ता भर्ती गर्ने, दोहोन गरेर खाने भाँडो बनाउने र त्यसपछि धराशायी बनाइदिने । शिक्षा र स्वास्थ्य सेवामूलक क्षेत्र हो । अहिलेका राजनीतिक दलहरूले शिक्षण र स्वास्थ्य संस्थालाई नाफामूलक क्षेत्रको रूपमा व्यापार गरिरहेका छन् । शीर्ष नेताहरू माफिया, बिचौलिया र दलालहरूसँग मिलेर व्यापार गरिरहेका छन् ।’
डा. केसीले पुँजीवादी भनिने देशहरूसमेत शिक्षा र स्वास्थ्य क्षेत्रमा व्यापारीकरण नगरी गुणस्तर कायम राख्न सफल रहेको उल्लेख गर्दै नेपालमा भने जनतालाई दुःख दिने काम मात्रै भएको बताए । उनले भने, ‘नेपालमा समाजवादीहरू जनतालाई शिक्षा र स्वास्थ्य निःशुल्क हुन्छ भनेर भोट माग्न जान्छन् । दुईतिहाइको सरकार भएपछि पेटमा लात हान्छन् ।’
उनले आफूसँग भएका सम्झौताहरू कार्यान्वयनमा सरकार उदासीन देखिएको भन्दै निरन्तर खबरदारीको आवश्यकता औँल्याए । डा. केसीले १९औँ अनशनका समयमा आफूसँग भएका सम्झौताहरू कार्यान्वनयको कुन चरणमा पुगे भनेर प्रश्न पनि गरेका छन् ।
