जाजरकोट हुँदै रणनीतिक सडक विस्तार भएपछि अहिले जिल्लामा मोटरसाइकलका बिक्री केन्द्र खोल्ने प्रतिस्पर्धा चलेको छ । दुई वर्षअघि मोटरसाइकल खरिद गर्न नेपालगन्ज र सुर्खेतसम्म पुग्ने जाजरकोटीहरूले अहिले सदरमुकाममै स्थापना भएका सोरुमबाट नै खरिद गर्न पाएका हुन् ।
जाजरकोट सदरमुकाम रहेको भेरी नगरपालिका भएर जाजरकोट–डोल्पा सडकखण्ड, जाजरकोट–जुम्ला र मध्यपहाडी लोकमार्ग सञ्चालन भएपछि मोटरसाइकलका बिक्री केन्द्र जिल्लामा भित्रिने क्रम बढेको हो । जाजरकोट, रुकुम पश्चिम र डोल्पाको बीचभागमा पर्ने जाजरकोटमा अहिले सवारीसाधन खरिद तथा बिक्री निकै बढेको छ ।
साउनदेखि असोजसम्म मात्र सदरमुकामबाट १ सय २० भन्दा बढी मोटरसाइकल बिक्री भएको लक्की तथा आदर्श सप्लायर्सका प्रमुख नगेन्द्र शाहले जानकारी दिए । योसहित जाजरकोटमा तीनवटा कम्पनीबाट उत्पादित मोटरसाइकलहरू बिक्री भइरहेका छन् ।
गाउँ–गाउँसम्म सडक विस्तार भएसँगै यातायातका साधनको चापसमेत बढेको छ । हलुका सवारीसाधनदेखि ठूला साधनसम्म जिल्लामा गुड्ने गरेका छन् । मुख्य सडक तथा पर्यटन मार्ग भएका कारण जाजरकोट भएर जाने सवारीसाधनको चाप बढेको हो ।