होम आइसोलेसनमा बसेका धरान– ९ का कोरोना संक्रमितको बुधबार राति मृत्यु भएको छ । धरानस्थित गौतम पथका ५८ वर्षीय पुरुषलाई थप उपचारका लागि बिपी कोइराला स्वास्थ्य विज्ञान प्रतिष्ठान लगिएलगत्तै उनको मृत्यु भएको हाे । अस्पताल पुर्याएको केही समयमा नै राति साढे ११ बजे उनको मृत्यु भएको वडा नं. ९ का अध्यक्ष रत्न कटवालले जानकारी दिए ।
उनका अनुसार मृतकलाई बुधबार दिउँसो नै अक्सिजन कमी भएर समस्या भएको थियो । उनलाई बिपी प्रतिष्ठानमा दिउँसो नै उपचारका लागि लैजाने पहल गरे पनि अक्सिजन भएको बेड अभाव भएपछि निजी अस्पतालबाट अक्सिजन किनेर घरमै राखिएको थियो । राति झन् गाह्रो भएपछि प्रतिष्ठान लगिएको थियो । मृतकलाई ८–१० दिनदेखि ज्वरो आएको भए पनि तीन दिनअघि मात्र कोरोना रिपोर्ट पजिटिभ आएको थियो ।
यस्तै धरानस्थित बिपी कोइराला स्वास्थ्य विज्ञान प्रतिष्ठानमा उपचाररत तेह्रथुम दाङपा– १ का ४९ वर्षीय पुरुषको पनि बुधबार राति मृत्यु भएको प्रतिष्ठानका सहप्रवक्ता डा. आशिष श्रेष्ठले जानकारी दिए । उनलाई गत असोज २५ गते प्रतिष्ठानमा भर्ना गरिएको थियो । असोज २६ गते कोरोना पजिटिभ भएपछि कोभिड अस्पतालमा उनको उपचार भइरहेको थियो ।