- वि.सं २०७८ जेठ २८ शुक्रबार
गृहमन्त्री रामबहादुर थापा ‘बादल’ले कोरोनाका कारण उत्पन्न भएको आर्थिक र सामाजिक असरका कारण अपराधका घटनाहरू बढ्न सक्ने भन्दै तिनलाई रोक्ने गरी सुरक्षा रणनीति बनाउन निर्देशन दिएका छन् ।
भर्चुअल रूपमा आयोजना गरिएको प्रदेश १ को प्रदेशस्तरीय सुरक्षा गोष्ठीलाई सम्बाेधन गर्दै गृहमन्त्री थापाले कोरोनाका कारण अपराधका नयाँ शैली बढ्न थालेको भन्दै यसलाई रोक्ने गरी सुरक्षा योजना र रणनीति बनाउन मातहतका निकायलाई निर्देशन दिएका हुन् ।
उनले पछिल्लो समय लैंगिक हिंसा र बलात्कारका घटना बढेको बताउँदै यस्ता घटनामा चनाखो र संवेदनशील हुन पनि निर्देशन दिए ।
उनले अन्तर्राष्ट्रिय सिमानाका बन्दलाई यथावत् राख्ने निर्णय भएको बताउँदै सीमानाका नियन्त्रण र नियमनलाई प्रभावकारी बनाइराख्न पनि आग्रह गरे ।
प्रहरी समायोजनसम्बन्धी प्रस्ताव पास भइसकेकोले अब समायोजनको प्रक्रिया अघि बढ्ने र छिटै प्रदेश प्रहरी गठन हुने विश्वास व्यक्त गरे । उनले दसैँ–तिहारजस्ता चाडपर्व नजिकएको भन्दै कालोबजारी र महँगी नियन्त्रणका लागि नियमित रूपमा बजार अनुगमन र कारबाही गर्न प्रमुख जिल्ला अधिकारीहरूलाई निर्देशन दिए ।
गृहमन्त्री थापाले चाडपर्वलक्षित प्रदेशस्तरीय र जिल्लास्तरीय सुरक्षा योजना बनाउन पनि मातहतका निकायलाई निर्देशन दिएका छन् ।
