पाठ्यपुस्तकमा कमिसनको खेल : प्याब्सनले तोकेको पाठ्यपुस्तक प्रयोग नगर्ने विद्यालयलाई ५० हजार जरिवाना
जरिवाना रकम प्याब्सन नगर समितिको खातामा जम्मा गरेको भौचर र आगामी दिनमा प्याब्सनका सम्पूर्ण निर्णय अवलम्बन गर्ने लिखित प्रतिबद्धता बुझाउन प्याब्सनको निर्देशन
आफूले तोकेको प्रकाशनगृहको पाठ्यपुस्तक प्रयोग नगरेको बताउँदै निजी तथा आवासीय विद्यालय अर्गनाइजेसन, नेपाल (प्याब्सन) धनगढी नगर समितिले विद्यालयहरूबाट जरिवाना असुल्न थालेको छ । नगर समितिले पत्र पठाउँदै तोकिएका पाठ्यपुस्तक प्रयोग नगर्ने प्याब्सन आबद्ध निजी विद्यालयलाई १० देखि ५० हजार रुपैयाँ जरिवाना तिर्न निर्देशन दिएको छ ।
जरिवाना रकम प्याब्सन नगर समितिको खातामा जम्मा गरेको भौचर र आगामी दिनमा प्याब्सनका सम्पूर्ण निर्णय अवलम्बन गर्ने लिखित प्रतिबद्धता बुझाउन पनि पत्रमा निर्देशन दिइएको छ । ओसन पब्लिकेसनको कम्प्युटर पुस्तक प्रयोग नगरेको बताउँदै प्याब्सनले जरिवाना असुल्न थालेको निजी विद्यालय सञ्चालकहरूले बताए ।
उक्त किताब प्रयोग नगर्दा ५० हजार रुपैयाँ जरिवाना तिर्न पत्र आएको धनगढीस्थित स्टेपिङ स्टोन बोर्डिङ स्कुलका प्रिन्सिपल रामजी हमालले बताए । प्याब्सनले जरिवाना नबुझाउनेलाई कडा कारबाही गर्ने धम्कीपूर्ण पत्र पठाएपछि विद्यालय सञ्चालकहरूले आपत्ति जनाएका छन् ।
कोरोना संकटका कारण विद्यालय नै बचाउन समस्या भएका वेला प्याब्सनले जरिवाना असुल्न थाल्दा सञ्चालकहरू थप मारमा पर्ने हमालले बताए । ‘पाठ्यपुस्तक परिवर्तन गर्दा विद्यार्थी मारमा पर्छन् भनेर यस वर्ष किताब बदलेका थिएनौँ । यो प्रकाशनको पाठ्यपुस्तक प्रयोग गर्नु भनेर प्याब्सनले भनेको पनि थिएन,’ हमालले भने, ‘अहिले आएर ५० हजार जरिवाना तिर्न पत्र आएको छ ।’
यस्तै, प्याब्सनमा आबद्ध धनगढीस्थित एरिस्टो स्कुललाई ४० हजार, ग्यालेक्सी स्कुललाई ३० हजार र गार्डनर बोर्डिङ स्कुललाई १० हजार रुपैयाँ जरिवाना तिर्न प्याब्सन नगर समितिले पत्राचार गरेको छ । विद्यालय सञ्चालकहरूका अनुसार धनगढीका नौवटा विद्यालयलाई प्याब्सनले आफूले भनेको पाठ्यपुस्तक प्रयोग नगरेकामा जरिवाना तिर्न भनिएको छ ।
विक्रेताको स्वार्थमा प्याब्सनले किताब प्रयोग गर्न बाध्य बनाउन खोजेको गार्डनर बोर्डिङ स्कुलका सञ्चालक कैलाश दाहालले बताए । ‘यो दादागिरी शैली हो,’ प्याब्सन कैलालीका पूर्वअध्यक्षसमेत रहेका दाहालले भने, ‘प्याब्सनले यो किताब प्रयोग गर भन्न पाउँदैन । यो विधानविपरीत हो ।’ यसमा संलग्न पदाधिकारी र व्यवसायीलाई कारबाही हुनुपर्ने उनको माग छ ।
प्याब्सनले भनेको जरिवाना आफूले नतिर्ने विद्यालय सञ्चालकहरूले बताए । प्याब्सन पदाधिकारीले प्रकाशन गृहसँग कमिसन खाएर किताब प्रयोग गर्न बाध्य बनाउन खोजेको उनीहरूको आरोप छ । प्याब्सन धनगढीका अध्यक्ष पदमबहादुर साउदले प्याब्सनको आयोजनामा गत वर्ष भएको छात्रा क्रिकेट प्रतियोगितालाई ओसन पब्लिकेसनले प्रायोजन गरेकाले उक्त पब्लिकेसनको किताब प्रयोग गर्न भनिएको बताए । ‘विद्यालय सञ्चालकसँग कुरा मिल्न थालेको’ भन्दै उनले यसबारे धेरै बोल्न चाहेनन् ।
निजी विद्यालयले प्रयोग गर्ने पाठ्यपुस्तकमा हरेक वर्ष कमिसनको खेल हुने गर्छ । कमिसनका आधारमा अधिकांश विद्यालयले हरेक वर्ष फरक–फरक प्रकाशनगृहका पाठ्यपुस्तक प्रयोग गर्न बाध्य बनाउँछन् । ‘विगतमा विद्यालय सञ्चालकले किताब प्रयोगबापत प्रकाशनगृहबाट कमिसन लिन्थे । यस वर्ष प्याब्सनले नै लिन खोजेपछि कमिसनको खेल उजागर भएको हो,’ एक बोर्डिङ स्कुलका शिक्षकले भने ।