बझाङ जिल्ला घर भई काठमाडाैं उपत्यकामा कार्यरत एक सैनिक जवानको शुक्रबार कोरोनाका कारण मृत्यु भएको छ । वीरेन्द्र अस्पताल छाउनीमा उपचारको क्रममा उनको मृत्यु भएको जंगी अड्डाले जनाएको छ । सेनामा यसअघि एकजना सैनिकको कोरोनाका कारण मृत्यु भएको थियो ।
सेनाका जवानलाई ६ असोजमा छारेरोगको लक्षण देखिएपछि आकस्मिक रूपमा आइसियूमा भर्ना गरिएको थियो । उपचारका क्रममा उनको मृत्यु भएको सेनाले जनाएको छ ।
बिहीबार उनको स्वाब परीक्षण गर्दा कोभिड– १९ पोजेटिभ देखिएको पनि सैनिक सूचना तथा जनसम्पर्क निर्देशनालयले जनाएको छ । सेनाका अनुसार हालसम्म सेनाका दुई हजार एक सय ९७ जना संक्रमित छन् । पाँच सय ३९ जना निको भएका छन् भने सेनामा सक्रिय संक्रमित एक हजार ६ सय ५६ जना छन् ।