डिभिजन वन कार्यालय मकवानपुरले राष्ट्रिय वन क्षेत्रभित्र सालको रूख काटेर अवैध चिरान गर्ने पाँचजनालाई पक्राउ गरेको छ ।
अनुगमनमा खटिएको टोलीले सोमबार मकवानपुरको पूर्वी क्षेत्रमा पर्ने बकैया गाउँपालिका– १ स्थित डाङडुङेको राष्ट्रिय वन क्षेत्रमा अवैध रूपमा सालको रूख काटेर चिरान गरिरहेको अवस्थामा पाँचजनालाई पक्राउ गरेको हो ।
उनीहरूले वनभित्र अवैध रूपमा रूख कटान गरिरहेको डिभिजन वनमा कार्यरत अधिकृत यामकुमार श्रेष्ठले जानकारी दिए ।
कार्यालयका अनुसार पक्राउ पर्नेमा रौतहट गुजरा नगरपालिका– २ बस्ने अन्चित माझी, सोही ठाउँका लालबाबु चौधरी, सत्यनारायण चौधरी, गुजरा नगरपालिका–९ बस्ने सोहन माझी र वीरेन्द्र चौधरी रहेका छन् ।
वन क्षेत्रभित्र चिरान गर्ने हातेमेसिनसहित उनीहरूलाई नियन्त्रणमा लिइएको कार्यालयले जनाएको छ ।
अवैध काठ चिरानमा संलग्न एक अभियुक्त फरार रहेको डिभिजन वन प्रमुख इमनाथ पौडेलले जानकारी दिए ।