मोरङको ग्रामथानमा रहेकाे पोखरीमा डुबेर एकै परिवारका तीन जनाकाे मृत्यु भएको छ । मृत्यु हुनेमा ग्रामथान–४ की ३५ वर्षीया सीता अधिकारी र उनका दुई छोरी १३ वर्षीया पवित्रा र ९ वर्षीया कृतिका रहेका इलाका प्रहरी कार्यालय बेलबारीका प्रहरी निरीक्षक ऋषिराज ढकालले जानकारी दिए ।

आइतबार साँझ घर छेउमा रहेको माछा पोखरीमा गएका छोरीहरु नफर्केपछि आमा उनीहरुलाई खोज्दै गएकी थिइन् । आमासमेत नफर्केपछि मृतकका  परिवारकाअन्य सदस्यले खाेज्ने क्रममा तीनै जना पोखरीमा डुबेको अवस्थामा फेला परेको प्रहरीले जनाएको छ । 

छोरीहरु डुबेको देखेपछि निकाल्न  पाेखरीमा पसेकी आमाको समेत डुबेर मृत्यु भएको प्रहरीको प्रारम्भिक अनुसन्धानले देखाएको प्रहरी निरीक्षक ढकालले बताए । 

मृतकहरूको शव पोष्टमार्टमका लागि कोशी अस्पताल विराटनगर पठाएइएको छ । घटनाबारे थप अनुसन्धान अघि बढाएको प्रहरीले जनाएको छ ।