नबिल बैंकले दसैँ, तिहार, छठजस्ता चाडपर्वको अवसर पारेर व्यक्तिगत मुद्दती खाता, साना तथा मझौला कर्जा, धितो कर्जा, व्यक्तिगत ओभरड्राफ्ट तथा घर कर्जामा नयाँ योजना ल्याएको छ । बैंकले विभिन्न किसिमका कर्जामा नयाँ ब्याजदरको योजना ल्याएको हो ।
बैंकले आफ्ना ग्राहकले मिहिनेतले कमाएको रकम राख्ने व्यक्तिगत मुद्दती खातामा उच्च ब्याजदर प्रदान गरेर कोभिड–१९ प्रभावित अवस्थामा आर्थिक कठिनाइ कम गर्न मद्दत पुर्याउने उद्देश्यले योजना ल्याएको जनाएको छ ।
योजनाअनुसार १३ देखि २४ महिनासम्मको व्यक्तिगत मुद्दती खातामा वार्षिक ९ प्रतिशत ब्याजदर प्रदान गर्ने जनाइएको छ । त्यस्तै, १ वर्षसम्मको मुद्दती खातामा बैंकले ८.५ प्रतिशत ब्याज दिने जनाएको छ । २ वर्षभन्दा माथि र ५ वर्षसम्मको व्यक्तिगत मुद्दती खातामा वार्षिक ९.२५ प्रतिशत र ५ वर्षभन्दा माथि व्यक्तिगत मुद्दती खातामा वार्षिक ९.५ प्रतिशत ब्याज दिने बैंकले जनाएको छ ।
बैंकले विभिन्न प्रकारका कर्जामा नयाँ ब्याजदर कायम गरेको र यसले ग्राहकलाई राहत हुने विश्वास लिएको जनाएको छ । जसअनुसार घर कर्जामा ७.४९ प्रतिशत, धितो कर्जामा र व्यक्तिगत ओभरड्राफ्टमा ७.९९ प्रतिशत र साना तथा मझौला कर्जामा १ करोड रुपैयाँसम्म लिएमा ७.४९ र १ करोड रुपैयाँभन्दा बढी लिएमा ७.९९ प्रतिशत ब्याजदर कायम गरेको बैंकले जनाएको छ ।
ब्याजदर एक वर्षसम्म परिवर्तन नहुने जनाइएको छ । बैंकले १ सय १९ शाखा, १ सय ८५ एटिएम र १ हजार ५ सयभन्दा बढी नबिल रेमिट एजेन्टमार्फत बैंकिङ सेवा दिँदै आएको जनाएको छ ।