कोरोना भाइरसको संक्रमणबाट सिराहाकी एक महिलाको प्रादेशिक कोभिड अस्पताल जनकपुरमा निधन भएको छ ।
सिराहाको कर्जन्हा नगरपालिकाकी २७ वर्षीया महिलाको प्रादेशिक कोभिड अस्पतालमा उपचारकोे क्रममा निधन भएको हो ।
ज्वरो र श्वासप्रश्वासको समस्या भएपछि शुक्रबार जनकपुरको काव्या अस्पतालमा भर्ना भएपछि श्वास फेर्न समस्या हुँदा आइतबार पिसिआर परीक्षण गरिएको थियो ।
पिसिआरको रिपोर्टमा पोजेटिभ देखिएपछि काव्या अस्पतालबाट कोभिड अस्पतालमा भर्ना गरी उपचार सुरु गरिएको प्रादेशिक कोभिड अस्पतालका संयोजक डा. जामुनप्रसाद सिंहले बताए ।
डा. सिंहले ती महिलाको कोरोना संक्रमणका कारण नै निधन भएको बताए ।
प्रादेशिक कोभिड अस्पतालमा कोरोना भाइरसको संक्रमणका कारण नै निधन भएको यो पहिलो घटना भएको भन्दै डा. सिंहले अन्य निधन भएका संक्रमितहरू भने विभिन्न प्रकारका दीर्घरोगका कारण निधन भएको जनाए ।
मृतकको फोक्सोमा संक्रमण फैलिएर श्वास अवरुद्ध भएर मृत्यु भएको डा. सिंहले बताए ।
यससँगै सिराहा जिल्लामा कोरोनाबाट मृत्यु हुनेको संख्या ११ पुगेको छ ।
मृतकको शव नेपाली सेनाको टोलीले व्यवस्थापन गर्ने तयारी गरिरहेको छ ।