मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १६ शुक्रबार
  • Friday, 29 March, 2024
२०७७ भदौ २७ शनिबार ११:०५:००
Read Time : < 1 मिनेट
समाचार डिजिटल संस्करण

खेलाडी चन्द्रकलामाथि जातीय विभेद गर्ने अभियुक्तसँग जनही तीन लाख धरौटी माग

Read Time : < 1 मिनेट
२०७७ भदौ २७ शनिबार ११:०५:००

नेपाल पुलिस क्लबमा आबद्ध एथ्लेटिक्सकी राष्ट्रिय कीर्तिमानी खेलाडी चन्द्रकला लामगादेलाई जातीय विभेद गर्दै कुटपिटमा संलग्न अभियुक्तलाई जिल्ला अदालत झापाले जनही तीन लाख धरौटी मागेको छ ।

घटनाका अभियुक्त दुर्गा श्रेष्ठ र उनकी श्रीमती विष्णुलाई जिल्ला अदालत झापाले जनही तीन लाखका दरले ६ लाख धरौटीमा रिहा गरेको हो ।

जिल्ला न्यायाधीश सन्तोषप्रसाद पराजुलीको इजलासले श्रेष्ठदम्पतीलाई ६ लाख धरौटीमा रिहा गरेको जिल्ला अदालत झापाका सूचना अधिकारी अम्बरबहादुर निरौलाले जानकारी दिए । जातीय विभेद तथा छुवाछुतको मुद्दामा सम्भवतः झापामा यो नै सबैभन्दा धेरै धरौटी रहेको उनले बताए ।

एथ्लेटिक्सतर्फ पटकपटक कीर्तिमान राख्न सफल खेलाडी लामगादेमाथि कुट्दै लखेटिएका दलित युवालाई जोगाउन खोज्दा मेचीनगर– १३ चारआलीमा गत ८ भदौमा कुटपिट भएको थियो ।

स्थानीय राजन दर्जीलाई जातीय रूपमा होच्याउने गरी गाली गर्दै श्रेष्ठदम्पतीले निर्घात कुटपिट गरेका थिए । त्यो क्रममा दलित समुदायमाथि होच्याउने शब्द प्रयोग नगर्न र यस्तो शब्द प्रयोग गरे कानुनी कारबाही हुने भन्दै सम्झाउँदा श्रेष्ठदम्पतीले सात महिनाका गर्भवती चन्द्रकलालाई निर्घात कुटपिट गरेका थिए । 

कुटपिटपछि घाइते भएकी चन्द्रकला केही दिनअघि मात्र अस्पतालबाट डिस्चार्ज भएकी छिन् । उक्त घटनापछि चन्द्रकलाका श्रीमान् सुमन खातीले इलाका प्रहरी कार्यालय धुलाबारीमा जातीय छुवाछुत गरेको भन्दै जाहेरी दिएका थिए ।

जाहेरीका आधारमा इलाका प्रहरी कार्यालय धुलाबारीले तीन महिनादेखि तीन वर्षसम्मको कदै माग दाबी गर्दै जिल्ला अदालतमा मिसिल पेस गरेको थियो । ‘सबैको सहयोगमा अनुसन्धान सूक्ष्म रूपले गरेका थियौँ । हामीले पत्रिकामा आएका समाचार पनि मिसिलमा हालेर अदालतमा पेस गऱ्याैँ,’ इलाका प्रहरी कार्यालय धुलाबारीका इन्चार्ज प्रहरी निरीक्षक कैलाश चौधरीले भने, ‘अदालतले जनही तीन लाख धरौटी माग गर्ने आदेश दिएकाे छ ।’