सिराहाको मिर्चैया नगरपालिका र अर्नमा गाउँपालिकामा बिहीबार पानीमा डुबेर दुईजनाको मृत्यु भएको छ ।
जिल्ला प्रहरी कार्यालय सिराहाका अनुसार बिहीबार साँझ मिर्चैया नगरपालिका– ९ कमलदहमा डुबेको अवस्थामा अन्दाजी २२ वर्षीया महिलाको शव भेटिएको हो ।
मृतक महिला सिराहाको ब्रह्मपुरी गाउँकी स्थायी बासिन्दा रहेको सूचना प्राप्त भएको इलाका प्रहरी कार्यालय मिर्चैयाका प्रमुख डिएसपी सन्तुलालप्रसाद जैसवालले जानकारी दिए । डिएसपी जैसवालले गाउँदेखि करिब ३० किलोमिटर उत्तरतिर पर्ने कमलदहमा उनी जानुको कारणबारे उनका आफन्त आएपछि खुल्न सक्ने बताए ।
मृतक महिलाको शव निकालेर लहानस्थित रामकुमार उमाप्रसाद स्मारक अस्पताल पठाइएको र थप अनुसन्धान भइरहेको उनले बताए ।
त्यस्तै, बिहीबार दिउँसो अर्नामा गाउँपालिका– ३ मा पर्ने मैनाबत्ती खोलामा नुहाउने क्रममा डुबेर घाइते भएका १० वर्षीय बालकको उपचारको क्रममा मृत्यु भएको प्रहरीले जनाएको छ ।
स्थानीय चन्दन महतो खोलामा नुहाउने क्रममा डुबेर घाइते भएको अवस्थामा गाउँलेले देखेपछि तत्काल उद्धार गरी स्थानीय क्लिनिकमा ल्याएका थिए । उनको उपचारको क्रममा मृत्यु भएको सिराहा प्रहरीले जनाएको छ ।