उच्च अदालत सुर्खेत जुम्ला इजलास र जिल्ला अदालत जुम्ला दुवै सिल गरिएको छ । उच्च अदालत सुर्खेत जुम्ला इजलासका दुईजना र जिल्ला अदालतका दुईजना कर्मचारीमा कोरोना संक्रमण देखिएपछि दुवै अदालत सिल गरिएको हो । 

उच्च अदालत सुर्खेत जुम्ला इजलासका मुख्य न्यायाधीश रत्नबहादुर बागचन्दका अनुसार बन्दी प्रत्यक्षीकरण र कोरोना विषयका मुद्दाबाहेक अरू सबै सेवा बन्द गरिएको छ । उनले भने, ‘अदालतकै कर्मचारीमा कोरोना पुष्टि भएपछि न्यायालय सिल गर्नुपरेको हो ।’

यसैगरी जिल्ला अदालतका श्रस्तेदार कपिल पौडेलद्वारा जारी सूचनामा अदालत क्षेत्रमा थप संक्रमण फैलिन नदिन सिल गरिएको उल्लेख छ । १८ भदौदेखि लागू हुने गरी अर्काे सूचना जारी नहुँदासम्म सेवा प्रवाह बन्द गरिएको जनाइएको छ ।