डडेल्धुराको भित्री मधेस क्षेत्र आलितालमा सालको वन फँडानीमा संलग्न थप तीनजनालाई नियन्त्रणमा लिइएको छ ।
आलिताल गाउँपालिका– ८ गोदाम–डोला–चिरान चक्रपथ निर्माणका क्रममा अढाइ हजार क्युफिट काठ काटिएको प्रारम्भिक तथ्यांक छ ।
अवैध रूपमा रूख काटिएपछि वन डिभिजन कार्यालयले अनुसन्धान थालेको छ । अहिलेसम्म पाँचजना पक्राउ परेका छन् ।
वन कार्यालयले गाउँपालिकाको जवाफ मागेपछि थप तीनजनालाई पक्राउ गरिएको निमित्त वन अधिकृत डबलबहादुर बोहराले जानकारी दिए ।
निर्माण कम्पनी उग्रतारा कन्स्ट्रक्सनसँग सम्बन्धित एकजना र अरू दुईजना गरी तीनजनालाई नियन्त्रण लिएकोे उनले बताए ।
उनले नियन्त्रणमा लिइएकाहरूमाथि अनुसन्धान जारी रहेको बताए ।
यसअघि एकजना सामुदायिक वनका अध्यक्ष र एकजना गोलिया ताछ्न गएका स्थानीयलाई नियन्त्रण लिएको थियो ।
सडक निर्माणका लागि ठेकेदारसँगको सम्झौतामा प्रमुख प्रशासकीय अधिकृतले हस्ताक्षर गरेका थिए । अनुगमन समिति संयोजक उपप्रमुख भएकाले दुईजनासँग बयान लिइएको उनले बताए ।
बयान र गाउँपालिकाको जवाफका आधारमा तीनजनालाई नियन्त्रणमा लिई अनुसन्धान थालिएको उनको भनाइ छ ।
असार महिनामा सडक निर्माण गरिँदा सालका रूख काटिएका थिए । रूख काटिएको भदौ ३ गते मात्र वन कार्यालयले थाहा पायो । रूखका गोलिया बनाई लुकाइराखेको अवस्थामा ११ सय क्युफिटभन्दा बढी काठ बरामद गरिएको छ ।
त्यसैगरी १४ वटा सिंगो रूख काटिएको अवस्थामा फेला परेका थिए ।