लकडाउनको समयमा विराटनगरमा हतियार देखाएर लुटपाट गर्ने गरेकाे आराेपमा नेपाल र भारतका युवाहरूको संगठित गिरोहलाई मोरङ प्रहरीले पक्राउ गरेको छ ।
पक्राउ पर्नेहरू भारत बिहार राज्यको सीतामढीका २७ वर्षीय राजु साह, मोरङ कटहरी गाउँपालिका– २ का २६ वर्षीय किसन साह, २८ वर्षीय एलेक्स भन्ने रविन शर्मा, २७ वर्षीय अभिषेक राय र सप्तरी बोदेबर्साइन नगरपालिका– ८ का २७ वर्षीय नन्दु भन्ने नन्दकिशोर साह छन् ।
सबैलाई उनीहरू बस्दै आएको डेराबाट लुटपाटमा प्रयोग भएको पेस्तोल र बन्दोबस्तीका सामान अनि नगदसहित पक्राउ गरेर प्रहरीले बुधबार सार्वजनिक गरेको हो ।
पक्राउ परेका सबैलाई प्रहरीले हातहतियार खरखजाना, आपराधिक लाभ, चोरी तथा संगठित अपराधमा मुद्दा दर्ता गराएको छ ।
मोरङका एसपी सन्तोष खड्काका अनुसार प्रहरीले गिरोहका सदस्य नन्दकिशोर साहको विराटनगर– ३ कञ्चनबारीस्थित डेराबाट ४९ हजार चार सय ५० भारतीय र नाै हजार २० नेपाली रुपैयाँसहित अटोमेटिक पेस्तोल एक थान र तीन थान गोली बरामद गरेको छ ।
त्यसैगरी उनीबाट विभिन्न कम्पनीको मोबाइल, दुई थान भारतीय बैंकको चेक, एक थान चक्कु र दुई थान मोटरसाइकल बरामद गरेको उनले जानकारी दिए ।
सप्तरीको बोदेबर्साइन घर भई विराटनगर– ३ कञ्चनबारीमा डेरा लिएर बस्दै आएका नन्दकिशोर साह र मोरङ कटहरी घर भएका अभिषेक साह लामो समयदेखि चोरीमा संलग्न रहँदै आएको प्रहरीले जनाएको छ ।
उनीहरूले नै संगठित गिरोह तयार गरेर भारतबाट ६ राउन्ड गोलीसहितको पेस्तोल मगाएर लुटपाट गर्न थालेको प्रहरीको प्रारम्भिक अनुसन्धान छ ।
प्रहरीका अनुसार गिरोहका सदस्यहरू कोही काठ मिस्त्रीको त कोही ग्यारेजमा मेकानिक अनि कोही फैन्सी पसलमा काम गर्दथे ।
११ लाख डकैतीपछि खुल्यो पोल
१५ भदौमा विराटनगर जलजला मोडस्थित चाइना बजारका सञ्चालक नरेश साहको घरमा संगठित गिरोहले हतियार र चक्कु देखाएर ११ लाख रुपैयाँ लुटेर लगेको थियो ।
प्रहरीेले त्यही पसलमा सेल्समेनको काम गर्ने भारतीय युवा राजु साहलाई नियन्त्रणमा लिएर सोधपुछ गर्दा संगठित गिरोह बनाएर लुटपाट गर्ने गरेको पोल खुलेको थियो ।
त्यसपछि प्रहरीले गिरोहलाई सक्रियतापूर्वक खोजी गरेर सबैलाई पक्राउ गर्न सफल भएको थियो ।
एसपी खड्काका अनुसार व्यापारीहरूको कारोबारको अवस्था र उनीहरूको कमजोरी पत्ता लगाएर यो समूहले पहिले कतै एसएमएसमार्फत हतियार देखाएर पैसा माग्ने गरेको थियो ।
पैसा नपाएमा कसैलाई प्रत्यक्ष हतियार देखाएर त कसैको घरमा गोली चलाएर धम्की दिने गर्दथ्यो । प्रहरीका अनुसार यो समूहले २५ असारमा विराटनगरका एक व्यापारीलाई एसएमएसमार्फत ज्यान मार्ने धम्की दिएर पाँच लाख रुपैयाँ लिएको थियो ।
पैसा लिनुअघि गिरोहले व्यपारीको घरमा गएर राति तीन राउन्ड गोली चलाएर धम्क्याएको थियो ।
यो गिरोहले १३ साउनमा अर्का एक व्यापारीलाई पनि त्यसैगरी एसएमएसमार्फत घरमा गएर एक थान गोली चलाएर धम्की दिँदै १० लाख मागेको थियो । तर, असुल्न भने पाएको थिएन ।