बारामा शुक्रबार एकैदिन सशस्त्र प्रहरीका ४९ जनामा कोरोना संक्रमण पुष्टि भएको छ । सशस्त्र प्रहरी बल नम्बर ४० रिजर्भ गण पिलुवा बारामा कार्यरत प्रहरीमा कोरोना संक्रमण भएको जिल्ला प्रहरी कार्यालय, बाराका प्रहरी प्रवक्ता प्रहरी नायव उपरीक्षक गौतम मिश्रले जानकारी दिए ।
बारा, पर्सा र रौतहट जिल्लाको सीमा सुरक्षाका लागि भन्दै सरकारले यही १ साउनमा रिजर्भ गण स्थापना गरेको हो । यसअघि सशस्त्र प्रहरी बल भद्रकाली गणका रूपमा थियो ।
भदौ ८ गते एक सय १५ जनाको स्वाब संकलन गरी परीक्षणका लागि हेटौँडा पठाइएकोमा ४९ जनामा कोरोना संक्रमण देखिएको गणपति मनोज थापाले जानकारी दिए ।
संक्रमित सबैलाई गणमै बनाइएको आइसोलेसनमा राखिएको छ । करिब ७० जना व्यक्तिलाई व्यवस्थापन गर्न सकिने गरी सशस्त्र प्रहरीले आफ्नो छुट्टै आइसोलेसन बनाएको छ ।
योसँगै बारामा संक्रमितहरूको संख्या आठ सय ६ पुगेको छ भने मृत्यु भएका १५ जनामा कोरोना संक्रमण देखिएको छ ।
कोभिड डेडिकेटेड अस्पतालको आइसोलेसनमा ९७ जना र घरकै आइसोलेसनमा तीन सय ५० जना रहेका छन् । दुई सय ९५ जना उपचारपछि निकाे भएर घर फर्केका छन् ।