धनकुटाका दुई प्रहरीमा कोरोना भाइरसको संक्रमण पुष्टि भएको छ ।
धरानस्थित बिपी कोइराला स्वास्थ्य विज्ञान प्रतिष्ठानमा पिसिआर परीक्षण गर्दा २५ वर्षीय र ३८ वर्षीय दुई पुरुष प्रहरीमा कोरोना संक्रमण पुष्टि भएको हो ।
२ भदौमा विराटनगरबाट केही प्रहरी सरुवा भएर धनकुटा आएका थिए । विराटनगरबाट सरुवा भएर आएका प्रहरीलाई कोरोना संक्रमण देखिएपछि कन्ट्याक्ट ट्रेसिङका आधारमा तीन प्रहरीको स्वाब संकलन गरेर पिसिआर परीक्षणका लागि पठाइएको थियो ।
जसमध्ये दुई प्रहरीमा कोरोना संक्रमण पुष्टि भएको स्वास्थ्य कार्यालय धनकुटाका प्रमुख तुलसी गुरागाईंले बताए ।
संक्रमण पुष्टि भएका प्रहरी जिल्ला प्रहरी कार्यालय धनकुटाको क्वारेन्टिनमा रहेका छन् ।
योसँगै धनकुटामा कोरोना संक्रमण पुष्टि हुनेको संख्या २० पुगेको छ । जसमध्ये १७ जना निको भएर घर फर्किएका छन् । एकजनाको विराटनगरमा उपचार भइरहेको छ ।