सत्तारुढ दल नेपाल कम्युनिस्ट पार्टी (नेकपा)का दुई अध्यक्ष केपी शर्मा ओली र पुष्पकमल दाहाल प्रचण्डबीचको छलफल सकिएको छ ।
छलफल पार्टीभित्र देखिएको समस्या समाधानका लागि सकारात्मक बनेको दाहालका प्रेस संयोजक विष्णु सापकोटाले जानकारी दिए । पार्टीभित्रको समस्या समाधान गर्ने कोणबाट छलफल अघि बढेको उनले बताए ।
अध्यक्ष ओली र दाहालबीच प्रधानमन्त्रीनिवास बालुवाटारमा बिहीबार बिहान ११ बजेदेखि दिउँसो ३ बजेसम्म चार घन्टा लामो छलफल भएको हो ।
उनीहरूबीच भोलि अर्थात् शुक्रबार पनि फेरि छलफल गर्ने तालिका राखिएको छ ।
दुई अध्यक्षबीच छलफल चलिरहँदा नेकपाका महासचिव विष्णु पौडेल र नेताहरू शंकर पोखरेल तथा जनार्दन शर्मा पनि बालुवाटार पुगेको बालुवाटार स्रोतले जनाएको छ ।
तर, उनीहरू अध्यक्षद्वयको छलफलमा सहभागी भए–नभएको भन्नेबारे स्रोतले केही खुलाएन ।