सिद्धार्थ बैंक लिमिटेडले संस्थागत सामाजिक उत्तरदायित्व कोषमा रहेको रकम सरकारको कोरोना भाइरस संक्रमण रोकथाम, नियन्त्रण तथा उपचार कोषलाई हस्तान्तरण गरेको छ । बैंकले २ करोड ६७ लाख २८ हजार रुपैयाँ कोषलाई हस्तान्तरण गरेको हो ।
उक्त रकम अर्थ मन्त्रालयमा आयोजित एक समारोहमा बैंकका अध्यक्ष मनोजकुमार केडियाले अर्थमन्त्री डा. युवराज खतिवडालाई हस्तान्तरण गरेको बैंकले जनाएको छ । उक्त अवसरमा अर्थमन्त्री डा. खतिवडाले बैंकलाई धन्यवाद दिँदै प्राप्त रकम सरकारले कोरोना रोकथाम एवं नियन्त्रणको काममा नै सदुपयोेग गर्ने बताए ।
यसअघि पनि बैंकले प्रदेश सरकार तथा विभिन्न स्थानीय तहलाई गरी ७६ लाख २४ हजार रुपैयाँ सहयोग प्रदान गरिसकेको जनाएको छ ।
कोरोेना भाइरस संक्रमण रोकथाममा बैंकले हालसम्म ३ करोड ४३ लाख ५२ हजार रुपैयाँ सहयोग प्रदान गरेको छ । यसरी प्रदान गरिएको रकमबाट कोरोना भाइरस संक्रमण रोेकथाम तथा उपचारका लागि सघाउ पुग्ने विश्वास लिएको बैंकले जनाएको छ ।