प्रदेश १ मा कोरोना संक्रमितको संख्या एक हजार ६ सय ११ पुग्यो, नौजनाको मृत्यु
प्रदेश १ मा बुधबारसम्म कोराेना भाइरसबाट संक्रमित हुनेको संख्या एक हजार ६ सय ११ पुगेको छ ।
प्रदेश १ सामाजिक विकास मन्त्रालयका प्रवक्ता डा. सुरेश मेहताका अनुसार बुधबारसम्म संक्रमितहरू एक हजार ६ सय ११ जना पुगेका हुन् ।
सामाजिक विकास मन्त्रालयले जानकारी गराएअनुसार बुधबार प्रदेशमा ४८ जना नयाँ संक्रमित थपिएका छन् ।
थपिएका नयाँ संक्रमितहरू मोरङका २४, सुनसरीका १४, झापाका नाै र प्रदेश १ बाहिरका एकजना छन् ।
बुधबार मोरङको विराटनगर महानगरपालिकामा १२ पुरुष, रंगेली नगरपालिकामा सात पुरुष र तीनजना महिला छन् । स्थानीय तह नखुलेका दुईजना पुरुष छन् ।
यसैगरी सुनसरीको धरान उपमहानगरपालिकामा पाँच पुरुष र चारजना महिला संक्रमित फेलापरेका छन् । दुहवी नगरपालिकामा तीनजना र कोसी गाउँपालिकामा दुईजना पुरुष संक्रमित भएका छन् ।
प्रदेश १ मा बुधबारसम्म कोरोना भाइरस संक्रमणबाट नौजनाको मृत्यु भएको छ ।