सरकारद्वारा प्रतिबन्धित नेपाल कम्युनिस्ट पार्टी (नेकपा) विप्लव समूहका दुईजना सुर्खेत जिल्ला समिति सदस्यलाई प्रहरीले पक्राउ गरेको छ ।
सोमबार भेरीगंगा नगरपालिका– ९ जहरेबाट उनीहरूलाई प्रहरीले पक्राउ गरेको जनाएको छ ।
विप्लव समूहका जिल्ला समिति सदस्य रहेका भेरीगंगा नगरपालिका– ९ जहरेका ४८ वर्षीय कर्णबहादुर बिसी र सोही ठाउँका ४२ वर्षीय सहवीर महरलाई पक्राउ गरिएको कर्णाली प्रदेश प्रहरी कार्यालयका प्रवक्ता राजेशनाथ बाँस्तोलाले जानकारी दिए ।
पक्राउ परेका बिसी र महरको साथबाट विभिन्न किसिमका दस्ताबेज, विभिन्न निर्माण व्यवसायी तथा कन्स्ट्रक्सहरूलाई आर्थिक सहयोगको लागि लेखेका पत्रहरू र रकम असुल गरेका रसिदका अर्धकट्टीहरू बरामद भएको प्रहरीले जनाएको छ ।