कर्णाली प्रदेशमा सोमबार २४ जनामा कोरोना संक्रमण भएको पुष्टि भएको छ । योसँगै कर्णालीमा कोरोना संक्रमितको संख्या दुई हजार तीन पुगेको छ ।
प्रदेश अस्पताल–पशुपन्छी रोग अन्वेषण प्रयोगशाला सुर्खेत र दैलेख अस्पतालमा गरिएका परीक्षणमा २४ जनामा कोरोना पुष्टि भएको हो ।
प्रदेश अस्पताल–पशुपन्छी रोग अन्वेषण प्रयोगशाला सुर्खेतमा गरिएको परीक्षणमा सल्यानमा ६ जना, सुर्खेतका एकजना गरी सातजना र दैलेख अस्पतालमा गरिएकाे परीक्षणमा दैलेखका १७ जनामा गरी २४ जनामा कोरोना संक्रमण देखिएको सामाजिक विकास मन्त्रालयका स्वास्थ्य सेवा महाशाखाका प्रमुख वृषबहादुर शाहीले बताए ।
‘योसँगै कर्णालीमा दुई हजार तीन पुगेको छ,’ उनले भने, ‘आज संक्रमित २४ जनामध्ये सबै १३ वर्षदेखि ५३ वर्ष उमेर समूहका महिला र पुरुष रहेका छन् ।’
कर्णालीमा सोमबार एकजना पनि संक्रमण निको भएर डिस्जार्च नभएको र हालसम्म डिस्चार्ज हुनेको संख्या एक हजार आठ सय ८० पुगेको स्वास्थ्य सेवा महाशाखाका प्रमुख शाहीले बताए ।
‘कर्णालीमा हाल एक सय १७ जना कोरोनाका सक्रिय संक्रमित बिरामी रहेका छन्,’ उनले भने, ‘उहाँहरूको विभिन्न अस्पताल तथा आइसोलेसन सेन्टरमा उपचार भइरहेको छ ।’