जिल्ला अदालत मोरङका एकजना न्यायाधीशमा कोरोना संक्रमण पुष्टि भएकाे छ ।
आइतबार स्वाब संकलन गरेर पिसिआर परीक्षण गर्दा एक न्यायाधीश संक्रमित देखिएका हुन् ।
अदालतका सूचना अधिकारी युवराज पौडेलका अनुसार मोरङ अदालतका आठजना न्यायाधीशमध्ये सातजना जिल्लाबाहिर भएकाले एकजना न्यायाधीशसहित कर्मचारीहरूको आइतबार स्वाब संकलन गरिएको थियो ।
न्यायाधीशलाई काेरोना संक्रमण भएपछि साेमबार अदालत र सरकारी वकिल कार्यालयका कर्मचारीकाे स्वाब संकलन भइरहेको छ ।
अदालतमा भएका एकजना न्यायाधीशमा पनि कोरोना संक्रमण भएपछि मोरङ जिल्ला अदालतमा थुनछेक बहस पनि प्रभावित भएको छ ।
विराटनगर महानगरको वडा नम्बर ९ सिल
विराटनगर महानगरपालिकाको वडा नम्बर ९ आइतबार साँझदेखि सिल गरिएको छ ।
कोरोना संक्रमित बढेपछि कन्ट्याक ट्रेसिङका लागि जिल्ला प्रशासन मोरङको आदेशअनुसार ७२ घन्टाका लागि वडा सिल गरिएको हो ।
साे वडाका ४२ जनामा संक्रमण पुष्टि भइसकेकाे छ ।
संक्रमितमध्ये दुईजनाको निधन भएकाे छ । सिल गरिएको वडामा सार्वजनिक सवारी आवतजावत गर्न प्रतिबन्ध लगाइएको छ भने अनावश्यक हिँडडुल गर्न पनि दिइएको छैन ।
समुदायस्तरमा कोरोना संक्रमण हुन थालेपछि विराटनगरमा १७ साउनदेखि १ भदौसम्मका लागि पूर्ण लकडाउन गरिएकाे छ ।
विराटनगरमा आइतबार साँझसम्म तीन सय ८२ जना कोरोना संक्रमित फेलापरेका छन् ।